Գիրքը լոյս տեսած է Երեւան, «Ինքնագիր» գրական ակումբին կողմէ, «Զանգակ-97» հրատարակչատունէն, «Գալուստ Կիւլպէնկեան» հիմնարկութեան աջակցութեամբ։
Գիրքին մէջ, թարգմանութեան կողքին տեղ գտած է մատենագիտական եւ ծանօթագրական ծաւալուն բաժին մը եւ Նշանեանի վերջաբանը՝ «Յայտնութենական մտածողութիւն մը» խորագրով, որուն նպատակը, ինչպէս ինք կ՚ըսէ, «համագրային մօտեցում մը հրամցնել»ն է, զուգահեռներ առաջարկելով Ագամբէնի եւ իր սիրած հեղինակներուն միջեւ, ինչպէս նաեւ անդրադարձ մը թարգմանական խնդիրներու, որոնք կը ծագին նման աշխատանքներու ընթացքին։ Գիրքի վերջաւորութեան զետեղուած է Ֆրանց Քաֆքայի Օրէնքին առջեւ կտորը։
