ՏԷՐ ՄԻՆԱՍԵԱՆ ԱՆԱՀԻՏ

Պատմագէտ, բեղուն հեղինակ եւ բարձրագոյն հիմնարկներու դասախօս, Անահիտ Տէր–Մինասեան ծնած է 1929ին՝ Փարիզ,Պելվիլ ժողովրդական թաղամասը:

Ամուսնացած՝ Լեւոն Տէր–Մինասեանի հետ, որդին ազգային–յեղափոխական գործիչ եւ հեղինակ–պատմիչ Ռուբէն Տէր–Մինասեանի, ունեցած է չորս զաւակներ (Թալին Տէր–Մինասեան պատմագէտ–դասախօս է նոյնպէս, իսկ Վահէ Տէր–Մինասեան՝ լրագրող):

Տիրացած պատմութեան դասաւանդման բարձրագոյն աստիճանին (agrégation d’histoire), Անահիտ Տէր–Մինասեան դասախօսած է նախ՝ լիկէոնի մէջ, ապա Ընկերային բարձրագոյն գիտութիւններու Հիմնարկին, ինչպէս եւ՝ իբր մագիստրոս–դասախօս՝ Փարիզ–Սորպոն համալսարանի ամպիոններէն: Իր հետաքրքրութիւններուն ծիրը ընդգրկած է առաւելաբար հայոց պատմութիւնը եւ աւելի յատկապէս՝ նորն ու նորագոյնը:

Կազմակերպած եւ վարած է բազմաթիւ սեմինարներ նշեալ հիմնարկի ծիրին մէջ, ընդգրկելով վերջին հարիւրամեակի հայոց պատմութիւնը: Մասնակցած է բազմաթիւ գիտաժողովներու՝ զեկուցումներով եւ դասախօսութիւններով: Հրատարակած է բազմատասնեակ յօդուածներ եւ մենագրութիւններ ֆրանսական թէ այլ լեզուներու գիտական մամուլին մէջ: Այս բոլորը՝ արեւմտեան աշխարհի զանազան գիտա–մշակութային գօտիներու մէջ, ինչպէս եւ հայկական նախաձեռնութիւններու, յատկապէս՝ Սփիւռքի տարածքին:

Իր կեանքի վերջին տասնամեակին, եւ հակառակ առողջական լուրջ մարտահրաւէրներու, այցելած է Պոլիս եւ Արեմտեան Հայաստան, ի խնդիր «ծածուկ հայ» արենակից–ազգականներու, ինչպէս եւ հայրենի Տարօն՝ Մուշ եւ Սասուն:

Հրատարակած է տասնեակ հատորներ՝ նուիրուած Հայաստանի, հայոց պատմութեան եւ հայոց ցեղասպանութեան, ինչպէս`
– «Հայկական հարցը» (La question Arménienne, Ed. Parenthèses).
– «1918-1920. Հայաստանի հանրապետութիւն» (1918-1920. La République d’Arménie, Ed. Complexe).
– «Խաչաձեւեալ պատմութիւններ – Սփիւռք, Հայաստան, Անդրկովկաս» (Histoires croisées – Diaspora, Arménie, Transcaucasie – Ed. Parenthèses),
– «Հայաստանը՝ մարտադաշտ պատերազմներու եւ յեղափոխութիւններու միջեւ» (L’échiquier arménien entre guerres et révolutions, Ed. Karthala):

Ունի նաեւ թարգմանութիւններ՝ հայերէնէ ֆրանսերէն, ինչպէս`
– Վահէ Օշականի «Օծում»ը (“Onction”)
– «Մեր մանկութեան հողերը» ժողովածուն (“Nos Terres d’Enfance”, Հուրի Վարժապետեանի հետ):
Երկուքն ալ՝ Parenthèses Հրատարակչութիւն:

Անահիտ ՏԷր Մինասեան մահացած է 2019ին՝ Ֆրէն, Փարիզի մօտ: