ԳՈՅՈՒՆԵԱՆ ԱՒ. ՔՀՆՅ. ԳԱՌՆԻԿ

Գառնիկ Աւ. Քհնյ. Գոյունեան, աւազանի անունով՝ Գէորգ, ծնած է Պուրճ Համմուտ, Լիբանան, 1967-ին:
Նախնական կրթութիւնը ստացած՝ Սրբոց Քառասնից Մանկանց Վարժարանին մէջ: Ապա՝ Կիլիկիոյ
Կաթողիկոսութեան Դպրեվանք մտած: Սարկաւագութեան աշակերտած է Գարեգին Կթղ. Սարգիսեանի, Արտաւազդ Արք. Թռթռեանի, Արամ Կթղ. Քէշիշեանի, Զարեհ Արք. Ազնաւորեանի, եւ պատմագէտ ու բանասէր Վազգէն Ղուկասեանի: Պէյրութի հայ վարժարաններու մէջ հայագիտական նիւթեր դասաւանդած է: 1995-ին, Քահանայական Օծում ստացած՝ Փարիզի Յովհաննէս Մկրտիչ Մայր Եկեղեցւոյ մէջ: 2000-ին՝ փոխադրուած Մոնթրէալ եւ ստանձնած Ս. Յակոբ Եկեղեցւոյ հովուական ծառայութիւնը, որուն քովն ի վեր՝ նաեւ հայ մշակոյթին եւ հայ գիրին սպասաւոր մըն է:
Մշակութային ծիրին մէջ՝
Ա) Կրօնագիտական, բարոյագիտական եւ գրական դասախօսութիւններ, լսարաններ:
Բ)«Նոր Ծաղիկ» մանկապատանեկան երգչախումբի ստեղծում եւ կազմակերպում համերգներուն _ երգչախումբին համերգներէն յատկապէս յիշատակելի են՝ 1) Բ. Կանաչեանի «Նանօր»ին վերախմբագրեալ քերթուածերգին (վերախմբագրումը կատարուած խմբավարին՝ Էլիզապէթ Պտղունի-Հարպոյեանի եւ իր կողմէ, իսկ երաժշտութիւնը՝ պատշաճեցուած եւ մշակուած Պետրոս Շուժունեանէ) մատուցումը. եւ 2) Մանկապատանեկան Պատարագի (խօսքերը իրն են, երաժշտութիւնը՝ Արեգ Լուսինեանի) մատուցումը:
Գ) Համագործակցութեամբ երաժիշտ Շուժունեանի՝ կազմակերպում համերգներու եւ նուագոյթներու, ինչպէս՝ 1) Կոմիտաս Վարդապետի ծննդեան 140-ամեակին նուիրուած համերգ մը, երգեցողութեամբ Viva Voce երգչախումբին. 2) համերգ Հայոց Ցեղասպանութեան 100-ամեակին նուիրուած «Վերյառնումի Պատարագ»ին (առաջարկը եւ բովանդակութեան կարգաւորութիւնը՝ իրն են, երաժշտութիւնը՝ Շուժունեանի), երգեցողութեամբ առիթին համար մեծացեալ St. Laurent երգչախումբին (120 հոգիներ):
Դ) Ս. Յակոբ Առաջնորդանիստ Մայր Եկեղեցւոյ պատկերազարդման համար համագործակցութիւն
նկարիչներու հետ, ինչպէս՝ Պետրոս Ասլանեանի եւ Պերճ Չաքըճեանի: Հայ գիրի ծիրին մէջ՝
Ա) Խմբագրում Կարապետ Եպս. Տէր Մկրտչեանէ գիրքի մը («Քրիստոնէութեան Իսկութիւնը»):
Բ) Խմբագրում եւ հրատարակում «Մաշթոց» Մատենաշարի (5 գիրքեր լոյս տեսած են. երկու գիրք՝
համագործակցաբար Իշխան Չիֆթճեանի եւ Մարուշ Երամեանի), խմբագրում եւ հրատարակում «Բան Եւ Գիր» Մատենաշարի (11 գիրքեր լոյս տեսած են):
Գ) Կրօնագիտական, բայոյագիտական եւ գրական ուսումնասիրութիւններ,
Դ) թարգմանութիւններ (ցարդ հրատարակուած երկու գիրք Ալեքսանդր Շմեմանէ):
Ե) Ինքնագիր հրատարակութիւններ՝ «Գրիգոր Նարեկացիի «Մեկնութիւն Երգոց Երգոյն Սողոմոնի» Գրքին Մեկնագիտութիւնը», «Եղծուած Հաղորդութիւնը», «Արամ Ա./Հայ Աստուածաբանական Մտքի Վերանորոգումին Համար», «Պատմութիւն Ս. Յակոբի Համայնքին/Որ Ի Մոնթրէալ, Գանատա», «Խոկումներ/Գր. Նարեկացիի «Մատեան Ողբերգութեան»ի Ընթերցմամբ», Ա. Տետր (կը բովանդակէ խոկումներ Մատեանի առաջին 5 գլուխներուն վրայ):