ՄԻՆԱՍԵԱՆ ՄԻՀՐԱՆ

Ծնած է Հալէպ, ուր յաճախած է Ազգային Հայկազեան վարժարան եւ Ազգային Քարէն Եփփէ ճեմարան:
Առանձին հատորով հրատարակած է հետեւեալ գիրքերը.
1- “ليحلَّ النور… وقصائد أخرى” («Եղիցի Լոյս Եւ… Այլ Քերթուածներ», Դամասկոս, 1995, 176 էջ): Պարոյր Սեւակի բանաստեղծութիւններէն հատընտիր մը՝ արաբերէն լեզուով:
2- “حبّة الرّمان. مائة قصيدة حبّ أرمنيّة” («Նռան Հատիկը – Հայկական 100 Սիրային Բանաստեղծութիւն», Դամասկոս, 1999, 126 էջ)։ Նահապետ Քուչակի վերագրուող միջնադարեան 100 հայրէններու արաբերէնի թարգմանութիւն։
3- «Անապատին Կակաչները» (Անթիլիաս, 2002, 86 էջ): Սուրիացի ժամանակակից վիպագիր–պատմուածագիր Իպրահիմ Ալ Խալիլի՝ Հայոց ցեղասպանութեան թեմայով գեղարուեստական գործերուն հայերէն թարգմանութիւնը:
4- “ثورة الحلبيين على الوالي خورشيد باشا العثماني (1819-1820) يوميَّات المطران أبراهام كوبليان“- «Հալէպցիներու Ապստամբութիւնը Կուսակալ Խորշիտ Փաշայի դէմ (1819-1820)- Աբրահամ Արք. Քիւփէլեանի Օրագրութիւնը», (Հալէպ, 2008, 240+8 էջ)։ Հրատարակութեան պատրաստութիւն, ուսումնասիրութիւն եւ ծանօթագրութիւններ։ Հեղինակակից՝ Պետրոս Արք. Միրաթեան։
5- “أقنعة ومرايا“- «Դիմակներ Եւ Հայելիներ» (Դամասկոս, 2010, 224 էջ)։ Կ՛ընդգրկէ թարգմանական ընտիր էջեր Համօ Սահեանէն, Զահրատէն, Զարեհ Խրախունիէն, Յովհաննէս Գրիգորեանէն եւ Իգնա Սարըասլանէն։
Այս հատորը 2009ին արժանացած է Սուրիոյ Մշակոյթի նախարարութեան «Սամի Ալտրուպի»ի անուան թարգմանչական առաջին մրցանակին։
6- «Կիլիկիոյ Հայերը» հատորին համահեղինակ, Պէյրութ, 2012։
Աշխատակցած է հայագիտական հանդէսներուն պատմա-բանասիրական ուսումնասիրութիւններով, նուիրուած՝ հայ հնատիպ գիրքին, հայ պարբերական մամուլի մատենագիտութեան, հայերէն ձեռագիրներուն, Հայոց ցեղասպանութեան պատմութեան եւ այլ թեմաներով։ Զբաղած է նաեւ բանահաւաքչութեամբ եւ Հայոց ցեղասպանութենէն հարիւրաւոր վերապրողներէ գրի առած է անոնց վկայութիւններն ու ազգագրական– բանահիւսական հսկայական նիւթ։
Արաբական պարբերական մամուլին մէջ մօտ 60 անգամ հրատարակած է հայ բանաստեղծութենէն թարգմանութիւններ, ինչպէս նաեւ տպած է արաբերէն լեզուով պատմա–բանասիրական ուսումնասիրութիւններ, իսկ հայ մամուլի էջերուն թարգմանաբար տպած է արաբ հեղինակներու հայկական թեմաներով գրած մօտ 35 գործ։
2012էն ի վեր կ՚ապրի Երեւան ու կը պաշտօնավարէ Մեսրոպ Մաշտոցի անուան Մատենադարանին եւ Հայոց Ցեղասպանութեան Թանգարան–Ինստիտուտին մէջ։