ԹԻՒՖԷՆՔՃԵԱՆ ՎԻԳԷՆ

Ծնած է Հալէպ։ 60-ական թուականներուն հաստատուած է Մոնթրէալ: 2006ին, Université de Montréal-էն վկայուած է անգլերէնով գրականութեան ճիւղին մէջ մագիստրոսի (M.A.) աստիճանով, իսկ 2016ին ստացած է իր դոկտորական կոչումը (Ph.D.) նոյն համալսարանէն, աւարտաճառի նիւթ ընտրելով կիներու անհատականութեան կազմաւորման խնդիրները ամերիկացի գրող Հենրի Ճէյմզի վէպերուն մէջ: Ասպարէզով ուսուցիչ, Թիւֆէնքճեան անգլերէն լեզու եւ գրականութիւն դասաւանդած է Université du Québec a Montréal-ի (1977-2002) եւ Սուրբ Յակոբ ազգային վարժարանին մէջ (1981-2010): 2002ին նշանակուած է այս վերջին հաստատութեան հայերէնով դասաւանդուող ծրագիրներուն պատասխանատու, իսկ 2010-2011ին վարած է նոյն վարժարանին տնօրէնութիւնը։ Իր մասնագիտութեան գծով, Թիւֆէնքճեան դասախօսութիւններ ներկայացուցած է միջազգային եւ հայկական գիտաժողովներու, հրատարակած ուսումնասիրութիւներ եւ հայերէնի թարգմանած քանի մը թատերախաղեր եւ պատմուածքներ։ 2014էն սկսեալ, անդամ է Համազգայինի Կեդրոնական Վարչութեան։ Անցեալին անդամակցած է «Հորիզոն Գրական յաւելուած»ի խմբագրութեան, իսկ այժմ «Բագին»ի եւ Համազգայինի Գանատայի Շրջանային վարչութեան «Օշական» մատենաշարի խմբագրական խորհուրդներուն։ Թիւֆէնքճեան ներկայիս կը վարէ Համազգայինի Գանատայի «Լեւոն Շանթ» հայերէնագիտական դասընթացքը ու նաեւ կը գործէ Համազգայինի Մոնթրէալի «Պետրոս Ադամեան» թատերախումբին մէջ իբր դերակատար եւ բեմադրիչ: 2014ին Մեծի Տանն Կիլիկիոյ Արամ Ա. Վեհափառ Կաթողիկոսը զինք պարգեւատրած է «Մեսրոպ Մաշտոց» շքանշանով։